الخير والشر كلمتين بيمثلوا الدنيا الي بنعيش فيها.. ربنا ادانا العقل عشان نفكر بيه وعشان نختار الطريق الصح لكن النفس اماره بالسوء ودايما بتدفعنا للشر لكن في الاخر لازم الخير ينتصر ممكن الشر ينتصر في جوله لكن في النهاية الخير بينتصر
…………….
كنت واقف قدام جدتي وهي بتموت ومش قادر اعمل حاجه هعمل اي انا طفل صغير…. جدتي حطيت ايدها علي وشي وفضلت تحرك شفايفها وفجأه شهقت بقوه وماتت… الحزن خيم علي البيت كله… في اليوم ده نمت وحلمت اني واقف قدام واحد طويل ونحيف جدا لكنه شكله انسان عادي حط كف ايده علي صدري كنت حاسس بنار بتكسر في عضمي فتحت عينيا ورفعت وشي وكانت الصدمه
……..
#هبةالشيطان
الجزء الاول
من وانا صغير وانا بشوف حاجات غريبه والاغرب ان الي بشوفه بيتحقق وكأني عشت الاحداث قبل كده او اشوف مكان ولما اروحه بكون حافظ تفاصيله كأني عايش فيه، انا اسمي فوزي عبدالرحمن عندي دلوقتي 25 سنه عايش مع امي.. ابويا توفاه الله من سنتين في حادث سير… ليا اخت واحده اسمها ناديه وهيا اصغر مني ب3سنين.. انا خريج كليه تربيه قسم تاريخ… رغم ان التفاصيل دي مش مهمه ليكم لكن انا حبيت اذكرها….. احنا عايشين في بيت عيله كبير كنت عايش فيه انا وابويا وامي وجدي والد ابويا وجدتي والده امي…. ومن هنا بتبدأ قصتي الي بدأت وانا صغير عندي 7سنين، جدتي كانت بالنسبالي لغز كبير مش قادر افهمه امي دايما كانت بتبعدني عنها ومعرفش اي السبب لكن يوم موتها كنت واقف قدام جدتي وهي بتموت ومش قادر اعمل حاجه هعمل اي انا طفل صغير…. جدتي حطيت ايدها علي وشي وفضلت تحرك شفايفها وفجأه شهقت بقوه وماتت… الحزن خيم علي البيت كله… في اليوم ده نمت وحلمت اني واقف قدام واحد طويل ونحيف جدا لكنه شكله انسان عادي حط كف ايده علي صدري كنت حاسس بنار بتكسر في عضمي فتحت عينيا ورفعت وشي وكانت الصدمه…. شوفت شخص قاعد علي السرير ومديني ضهره زي اي طفل في الموقف ده فضلت اعيط وانادي علي ابويا الباب اتفتح ولقيت ابويا داخل وبيقولي مالك يا حبيبي في اي… قولتله في حد كان قاعد علي السرير دلوقتي… قلي اكيد كنت بتحلم نام مفيش حاجه نام… مكنتش عارف انام من الرعب لكن غصب عني النوم كبس عليا ونمت… شوفت نفسي في بيت الاضاءه بتاعته خافته جدا مفيش حد هنا الظاهر فضلت ماشي في البيت ده لكن اي ده البيت ده انا عارفه كويس ده بيت عمتي سنيه… دخلت الاوضه لقيت عمتي نايمه علي السرير وبتاخد نفسها بالعافيه بس واضح انها مش شيفاني لكنها في لحظه اتلفتت وبصتلي وبرقت ومدت ايديها ناحيتي لكنها شهقت بقوه وماتت ايوه ماتت… قومت من النوم مش عارف بيحصل ايه لقيت ماما داخله الاوضه وبتقولي يلا يا فوزي عشان تفطر يلا هتتأخر عن المدرسه… خرجت من الاوضه لكن انا كنت مركز في حاجه تاني انا كنت مركز في الحلم الي شوفته… سألت بابا هو عمتي سنيه تعبانه… رد بابا اه وانت عرفت منين… قلي اصلي حلمت امبارح انها ماتت… لكن بابا ادايق مني وقلي بعد الشر مينفعش تقول كده… واحنا بنتكلم تليفون البيت رن قام بابا ورد وقال لا إله إلا الله ان لله وان اليه راجعون انا جاي دلوقتي… بابا قفل الخط وبصلي باستغراب.. امي سألته مين الي مات قالها سنيه اختي كل النظرات كانت متصوبه تجاهي انا الي قولت انها هتموت… لقيت بابا بيقولي انت عرفت منين ان عمتك هتموت… قولتله حلمت انها هتموت… اتحركنا كلنا علي البلد الي فيها عمتي وهي بتبعد عننا مسافه ساعه بالعربية وصلنا تحت البيت وطلعنا بسرعه كنت معاهم ورغم صغر سني عاوز اشوفها وهي ميته دخل بابا اوضتها وانا وراه والمفاجأه انها ميته بنفس المنظر الي شوفتها بيه في الحلم…. عمتي ادفنت واتعمل عزا كبير ابويا رغم حزنه مكنش مصدق موضوع الحلم نهائي خلص العزا وبدأت الحياه ترجع لطبيعتها من تاني وفي يوم رحت المدرسه وزي اي طفل في سني بيلعب مع صحابه اتخنقت مع ولد زميلي في المدرسه وانا مكنش ليا في المشاكل وزقني ووقعت علي الارض واتعورت.. رجعت البيت ببكي ابويا شافني وقلي متزعلش وبكره انا هروح معاك المدرسه وهجبلك حقك… نمت في اليوم ده وصحيت علي صوت غريب معايا في الاوضه فتحت عينيا وانا بين الصحيان والنوم شوفت ظل واقف قدام السرير… كنت خايف مرعوب وفضلت اعيط وانادي علي بابا وماما الي دخلوا عليا ومكنش فيه اي حاجه… في الصبح بابا جيه معايا المدرسه وسألنا على الولد الي ضربني وعرفنا انه غايب عن المدرسه عشان رجله اتكسرت.. بابا قلي هنروح نزوره وفعلا روحنا.. الراجل والد الطفل ده اول ما شافنا كأنه شاف عفريت انتوا ليكو عين تيجوا لحد هنا… بابا مكنش فاهم حاجه وفضل يتجادل مع الراجل والي سمعته كان غريب فعلا الراجل قال ابني كان راجع البيت من المدرسه اتفاجئ بأبنك واقف في نص السلم عينيه كانت سوده تماما وبعزم ما فيه زق ابني وقع من علي السلم ورجله اتكسرت…. بابا اقسم للراجل اني متحركتش من البيت وبعد نقاش طويل…. رجعنا البيت قرر بابا يقري عليا قرآن وحصلت حاجه اغرب من الخيال.. بابا كان بيقرأ قرآن لكن انا الصوت مش وصلي وكأني اطرشت يعني اي قولت ده لبابا الي مكنش فاهم اي الي بيحصل…. بدأت الامور تهدي تدريجياً وفاتت عشر سنين كامله كان الي بيحصل مجرد كوابيس سني وصل 17 سنه وفي يوم عيد ميلادي ال17 كنا عاملين حفله كده في البيت وعازم فيها كل صحابي وانا في الحفلة دخلت الحمام وانا خارج نو الحمام اطفي وحسيت بنور جاي من جوه المرايا بصيت وكانت الصدمه…. يتبع الجزء التاني
……
#هبةالشيطان
الجزء الثاني
لما بصيت في المرايا لقيت شخص واقف في الانعكاس بتاع المرايا.. انسان عادي لكن مش انا.. انا من الصدمه مكنتش عارف انطق ولا اتكلم كنت واقف متنح لكن هو اتكلم وقلي متخفش يا فوزي انا مش جاي اضرك انا جاي اعرفك طريق النعيم الي انت ضليته ولسه بتضله…. في اللحظة دي الباب خبط وهو اختفي… كان صوت بابا فوزي يا حبيبي انت اتأخرت كده ليه في الحمام انت كويس… اه يا بابا خرجت من الحمام وانا مش فاهم في اي ومين الشخص ده خلص اليوم ودخلت عشان انام دخلت السرير وحطيت راسي علي المخده.. لكن سمعت صوت بينده عليا صوت جاي منين مش عارف اتلفت ورايا كان قاعد علي السرير هو هو الشخص الي كنت بشوفه وانا صغير وقلي متخفش يا فوزي قولتلك انا مش جاي اضرك… قولتله انت مين… قلي انا اسمي عائد انا هريحك انا مش من بني الانس بس انا جاي اساعدك جاي اوصلك للنعيم زي ما قولتلك، انت في ايدك معرفه انت مش عارف تستخدمها صح… معرفه اي الي بتكلم عنها… انت عندك قدره علي قراءه الافكار انت بتقدر تتواصل مع ارواح عارف ده معناه اي انت ممكن تبقي ملك ممكن تخلي الناس تحت سيطرتك ممكن تنتقم من كل الي ظلمك في يوم… بس انا مستحيل اعمل كده… ليه انت قوي انت عندك قوه انت مش عارف قيمتها… انا مش ممكن استخدم حاجه انعم عليا ربنا بيها في الشر.. وكأني قولت حاجه غلط وقلي انا الي منحتك الهبه دي انا مش حد تاني…. باب الاوضه خبط قومت وفتحت باب الاوضه كانت امي وقلتلي انت بتكلم مين.. قولتلها مفيش حد.. بصيت ورايا كان اختفي… فضلت صاحي لحد صلاه الفجر.. قومت صليت الفجر وفضلت استغفر ربنا… كنت ناوي تانى يوم هسافر مع صحابي رحله لاسكندريه نمت من غير كوابيس وصحيت علي تليفون من واحد صاحبي اسمه طارق وقلي يلا يبني هنتأخر.. قومت وكنت مجهز شطنتي دخلت الحمام ولبست ونزلت عشان نروح الرحلة ركبنا الاتوبيس ووصلنا الاسكندريه بعد رحله طويله ونزلنا في فندق صغير علي البحر.. طلعنا الغرف بعد ما خلصنا الاجراءات كنت تعبان من السفر ونمت صحيت علي صوت طارق بيقولي اصحي فوزي اصحي فتحت عينيا وبقوله في اي قلي في حد معانا في الاوضه انا كنت نايم لقيت الغطا بيترفع من عليا وبيترمي في الارض قومت عشان اجيبه شوفت ظل ماشي ودخل الحمام شكل الاوضه دي مسكونه… ضحكت وقولتله مفيش حاجه انت اكيد بس بيتهيألك… لكن واحنا بنتكلم سمعت حد بيزعق وصوت عالي بره قومت بسرعه وفتحت الباب كان نزيل بيزعق مع حد من الواضح انه تبع الاداره وكان بيقوله ازاي اتسرق وانا في الفندق دي شطنه وفيها فلوس ناس لو الشنطة دي مرجعتش انا هكلم الشرطه…. وانا واقف عرفت ان الي بيزعق ده اسمه هشام ومعاه اخوه عادل وان هشام اتسرق منه مبلغ كبير… سمعت صوت في عقلي بيقولي عاوز تعرف مين الحرامي ركز في السؤال وانت هتعرف الاجابه غمض عينيك.. غمضت عينيا شوفت عادل بيحط حبايه منوم لاخوه في العصير وبياخد الشنطة وبيخرج بيها للجراج وبيحطها في عربيه…. فتحت عينيا علي الصوت من تاني يلا عرف هشام الحقيقه خليه ينتقم من اخوه.. رديت علي الصوت لا مستحيل اعمل كده.. نزلت الجراج حاولت مخليش حد يشوفني طفشت باب العربيه وجبت منها الشنطة خبطت علي اوضه هشام وسبت قدامها الشنطة..فتح الباب ولما لقي الشنطة قدامه مكنش مصدق نفسه من الفرحة… طبعا اتأكدت ان الممر مفهوش كاميرات رجعت الاوضه ودخلت الحمام ظهرلي تاني في انعكاس المرايا بس المره دي كان وشه اسود وكان غاضب جدا وقلي انت غبي ليه مقولتش لاخوه الحقيقه… قولتله لاني مش هعمل الشر مش هعمل فتنه ما بين اتنين اخوات… ضرب بايديه علي المرايا اتكسرت وانا رجعت لورا وسمعت طارق بيقولي اي الصوت ده افتح يا فوزي انت كويس طيب.. قولتله انا كويس وفتحت الباب بس قبل ما افتح بصيت ورايا لقيت المرايا رجعت زي ما كانت سليمه، خرجت من الحمام وبعد يومين رجعت البيت وخلصت الرحلة لكن لما رجعت لاحظت ان فيه لمه وزحمه ناحيه بيت الاستاذ سليم مدرس التاريخ ولما سألت اتقلي ان بنته ولاء عليها جن عاشق وانهم بيحاولوا يخرجوه من عليها ومحدش قادر عليه… دخلت البيت وسألت ماما قلتلي انا معرفش حاجه عن الموضوع ده اللهم احفظنا يارب..دخلت اوضتي ومن الاجهاد والتعب نمت وشوفت نفسي واقف في ارض جافه وفي نص الارض دي شجره ومربوط فيها واحده بسلاسل لما قربت كانت ولاء جيت اشيل السلاسل دي لكنه ظهر في وشي شكله بشع لدرجه محدش يتخيلها وشه الي مليان شعروعينيه الدمويه بس يوصفوا الخوف والرعب الي بتعيشه البنت… وصحيت بصيت في الساعه كانت 9بليل ونزلت لقيت صوت صراخ جاي من بيت الاستاذ سليم من غير تردد قربت من البيت وخبطت.. فتحتلي الست سميره ودي تبقي مرات الاستاذ سليم لكنها مش ام ولاء لا مرات ابوها… قلتلي نعم مردتش عليها ودخلت.. لقيت الشيخ بيقري قرآن وبيقول العمل مدفون هنا بس احنا لازم نلاقيه غمضت عينيا وانا بسأل نفسي العمل فين فين ظهر قدامي مشهد للست سميره بتشيل بلاطه من أرضية الاوضه وبتحط تحتها كيس… قربت من الشيخ وهمست ليه في ودنه عن مكان العمل هز دماغه وراح ناحيه الارض وخلع البلاطه وطلع الكيس… شوفت الكسره والكره في عين الست سميره طلبت من الشيخ انه يقول للاستاذ سليم عشان وجودها كان هيضر ولاء تاني.. الشيخ قلي انه هيتصرف..الي عرفته ان الاستاذسليم عرف وطلقها. للأسف الاستاذ سليم قال اني انا الي عالجت بنته وفي ظرف يوم بقيت البركه الي بيعالج الناس… والناس كانت تجيلي من كل حته عشان اعالجها لحد ما جيه اليوم الي كنت نايم وحلمت اني واقف في مشرحه وقدامي جثه متغطيه كشفت الجثه وكانت الصدمه لانها جثه جثه……. يتبع الجزء الثالث والاخير
………
#هبةالشيطان
الجزء الثالث والاخير
الجثه كانت جثه ابويا.. جثه ابويا كان ميت وعلي وشه اشد علامات الرعب والفزع… قومت من النوم مفزوع لقيته في وشي مبتسم… وقلي هتقدر تنقذه يا شيخ فوزي هتقدر تنقذه من الموت هينفعك الخير الي انت ماشي فيه… رديت عليه ربنا قادر ينجيه… ضحك وقال لا انا الي اقدر انجيه اسمع كلامي حط ايدك في ايدي… ولقيته بيمد ايده ناحيتي.. قولتله اعتبرني موافق هعمل اي… ابتسم بخبث وقلي روحك هتبيع روحك ليا… ازاي اببع روحي انت مجنون… قلي انت هتعمل الي اقولك عليه بس لو حطيت ايدك في ايدي هتملك المعرفه المحرمه علي البشر وكنوز الارض تبقي تحت ايديك مفيش قدامك حل تانى… قولتله انا مستحيل اعمل كده انا عمري ما هأذي بني ادم…. بصلي بغضب وقلي يبقي تستحمل اختيارك يا شيخ فوزي واختفي… نمت وصحيت علي صوت صراخ واحده ولقيت باب اوضتي بيخبط وامي بتقولي اصحي يبني بسرعه.. صحيت وفتحت الباب شوفت 3ستات منهم واحده كان واضح عليها انها مأذيه حاولت اركز وغمضت عينيا عشان اعرف اي الي بيأذيها لكن حسيت بصداع مش عارف اركز وسمعته بيضحك وبيقولي مش هسيبك تعالجها يا شيخ فوزي هنزل صورتك في الارض… فتحت عينيا لقيت الست مبتسمه بخبث… اعوذ بالله من همزات الشياطين واعوذ بك ربي ان يحضرون.. اعوذ بكلمات الله التامات من شر ما خلق… صرخ في ودني وقلي اسكت يا فوزي اسكت غمضت عينيا.. شوفت الست دي قاعده في خطوبه وبتشرب عصير والي بتقدم العصير كانت بتقول في نفسها اشربي العصير عشان تحاولي تاني تطفشي مني جوزي… والي فهمته ان الست الي عامله العمل ده وحطيته في العصير شايفه ان الست الي قدامي دي بتحاول تخطف جوزها منها… ده خلاني فتحت عينيا وقريت ايات من سوره البقره والصافات.. الست حصلها حاله قيئ رهيبه وفضلت ترجع… قولتلهم هتبقي كويسه متخفوش… قعدت مع نفسي واول مره احس انى مش عايز اقعد مع حد… وانا قاعد حسيت البيت بيتهز زي ما يكون فيه زلزال وليه هو فعلا زلزال البيت بيوقع اخدت اهلي بسرعه وخرجت من البيت بصعوبه.. مكنتش عارف انا هروح فين انا واهلي مكنش قدامنا غير بيت جدي الي في الصعيد ركبنا القطر كلنا عشان نروح الصعيد ونعيش في بيت جدي والي فهمته ان عائد هو الي ورا هدم البيت عشان يبعدني عن علاج الناس من السحر عشان يبعدني عن الخير الي كنت بقوم بيه…. وصلنا القريه الي كان عايش فيها جدي وروحنا علي البيت الي رغم انه كان دون المستوي لكن هنعمل ايه مفيش حل تانى… قررت اني هبدأ من جديد وهبعد عن كل حاجه وهلتزم بالصلاه ولازم اغير حياتي، بدأت فعلاً التزم بالصلاه وحفظ القرآن وكنت زيي زي اي حد في القريه ومحدش كان يعرف حكايتي… ومرت سنين لحد ما سني وصل 23سنه الحياة كانت هاديه لكن واضح ان الهدوء الذي يسبق العاصفة… في يوم والدي نزل علي اساس انه هيحيب طلبات للبيت انا كنت نايم وقتها وحلمت.. حلمت ان ابويا ماشي في طريق وجات عربيه وبمنتهي السرعه خبطته الي كان في العربيه نزل يشوفه لكن لما لاقيه مات جري وركب عربيته وهرب… قومت من النوم مفزوع علي صوت تليفوني بيرن الو مين… استاذ فوزي معايا.. ايوه مين… انا عندي ليك خبر حاول تتمالك نفسك البقاء لله والدك اتوفي.. اخدت عنوان المستشفى ونزلنا انا وامي المنهاره من العياط وجدي وروحنا المستشفى.. دخلنا المشرحه ونفس المشهد الي شوفته في الحلم دلوقتي بيتكرر لكن الفرق ان الي علي وش ابويا ابتسامه مش فزع….. صمت بيقال ان الفراق علي قد ما هو صعب لكنه بيقوي وده كان حالي الصمت دموعي بتنزل لوحدها علي فراق اغلي انسان في حياتي.. مش مصدق انه مات حتي وانا بدفنه بايديا… عملنا عزا كبير مكنتش مدرك ان ده عزا ابويا كنت تايه وسط وشوش الناس مادد ايدي بسلم ومش حاسس اصل الي راح ده ضهري وسندي…. خلاص العزا خلص طلعت اوضتي وقفلت علي نفسي لكن صوته كان بيدوي في ودني ابوك مات ابوك مات يا فوزي والي موته مهنش عليه ينقله المستشفى… وفي لحظه كان واقف قدامي مش قولتلك مش هيقدر ينجيه تعرف لو كنت وافقت علي العهد كنت نجيته… دلوقتي انت لسه قدامك الفرصه وافق وانا هخليك تنتقم منه ومد ايده انا كنت مش حاسس ومغيب مديت ايدي وسلمت عليه وقلي هعملك اي حاجه تطلبها لكن تنفذ كلامي… لقيت المكان حوالينا بيتبدل وشوفت الراجل الي خبط ابويا قاعد بيتغدي مع مراته وابنه وبنته.. قلي محدش شايفنا دلوقتي خلص يلا انتقم قربت منه وحطيت ايدي علي قلبه… الراجل بدأ يتنفس بصعوبه ومراته وعياله اتلموا حواليه مالك فيك اي.. سمعت صرخ بنته الصغيره وهي بتقول متمشيش يا بابا الراجل كان خلاص هيموت… افتكرت كلام جدي.. الشر لو اتمكن مننا الدنيا دي هتبقي غابه ربنا زرع فينا التسامح والعفو عند المقدرة عليك بالخير الخير وبس…. رفعت ايدي عن قلبه ورجعت لورا فضل الراجل يكح وشربوه ميه وبعدين فاق المشهد اتبدل ورجعت اوضتي… وظهر قدامي عائد وصرخ فيا مفيش فايده فيك قولتلك اسمع كلامي انت خلاص وافقت علي العهد…. لا مش هسمع كلامك انا عمري ماهكون كده عمري ما هخون تربيتي ولا هكفر بالله انت الشيطان الي بتحاول توصلني للشر انا مش زيك… جاي تقول كده دلوقتي انا وهبتك حاجه خلت ليك قيمه… وانا دلوقتي بقولك مش عاوزها خدها خلاص انا مش عايز حاجه… لو اخدتها منك هتموت يا فوزي.. هموت وانا موافق اموت انا تعبت… ده اخر كلام… ايوه ده اخر كلام.. حط ايده علي صدري وبدأ يقول كلام انا مش فاهموا حسيت بضعف في كل جسمي واني مش قادر اقف وقعت علي الارض واخر حاجه شوفتها كانت صوره الشيطان ده وهو مبتسم……….. بسم الله ارقيك من كل شئ يؤذيك، فتحت عينيا علي صوت جميل كنت نايم في السرير وقدامي شيخ لحيته بيضه وشه منور وقلي حمدالله بالسلامه يا بطل.. انت مين.. مش مهم انت اتكتبلك عمر جديد عشان تكمل الخير الي بتعمله وعشان انت مدتش فرصه للشر ينتصر عليك… ربنا نصرك علي شيطانك ورجعت تاني للحياه اهم حاجه لازم تؤمن ان الشر لسه منتهاش وان لسه حربك مستمره… وقام ومشي.. يا مولانا يا شيخ.. باب اوضتي اتفتح وكانت امي.. حمدالله على سلامتك يبني… ماما هو الشيخ الي كان هنا اسمه اي… شيخ. شيخ مين مفيش حد كان هنا… انت بقالك شهر في غيبوبه والحمدلله انك فوقت… مش مصدق كل الي حصل معايا… مرت سنتين علي القصه دي وانا بحكيها النهارده عشان الناس تفهم وتعرف قيمة الخير
…..
تمت
